अवधूतवाडी पोलीस ठाण्यातील मालखान्यात 6 वर्षांपूर्वी हेराफेरी झाल्याचा प्रकार उघडकीस

 यवतमाळ अवधूतवाडी पोलीस ठाण्यातील मालखान्यात 6 वर्षांपूर्वी हेराफेरी झाल्याचा प्रकार उघडकीस आला आहे. जप्तीच्या सोन्यात अफरातफर प्रकरणाची चौकशीचे आदेश जिल्हा पोलीस अधीक्षक दिलीप भुजबळ पाटील यांनी दिले आहेत.

या प्रकरणाची चौकशी उपविभागीय पोलीस अधिकारी माधुरी बाविस्कर यांच्याकडे देण्यात आली आहे. या घोटाळ्या प्रकरणी मालखान्याचे पुन्हा निरीक्षण करून रेकॉर्ड तपासले जाईल, अशी माहिती माधुरी बाविस्कर यांनी दिली आहे. यवतमाळच्या अवधूतवाडी पोलीस ठाण्यातील मालखान्यात 6 वर्षांपूर्वी झालेल्या हेराफ़ेरीचे प्रकरण उजेडात आल्यानंतर आधीच वादग्रस्त ठाणे म्हणून ओळख असलेल्या अवधूतवाडी पोलीस ठाण्यात पुन्हा एकदा खळबळ उडाली आहे. 6 वर्षांपूर्वी येथे असलेल्या एपीआयने पकडलेल्या चेनस्नॅचरकडून हस्तगत सोन्याचा ऐवज मालखान्यात जमा केला होता. जप्तीतील 300 ग्रॅम सोने मात्र आता मालखान्यात नाही अशी माहिती पुढे आली. त्यामुळे आरोपी व त्याकडून जप्त सोन्याच्या ऐवजाबाबत संपूर्ण कारवाई झाली नसावी, अशी शंका व्यक्त होत आहे. गुन्ह्यात वापरलेला तसेच चोरांकडून आणि आरोपींकडून जप्त करण्यात आलेला मुद्देमाल हा मालखान्यात जमा केला जात असतो. यात सोन्याचांदीचा ऐवज, अग्निशस्त्रे, शस्त्रे यांसह जप्तीतील दारू आदी मुद्देमाल ठेवण्यात येत असतो. याबाबतची नोंद मालखाना मोहररला ठेवावी लागते. वेळोवेळी त्याचे निरीक्षणही गरजेचे असते. मात्र, त्याकडे दुर्लक्ष होत असल्याचे बघून पुन्हा ही अफरातफर झाल्याची चर्चा आहे.