Ghatkopar Hoarding Collapsed : घाटकोपरमध्ये पेट्रोल पंपावर होर्डिंग कोसळून मोठी दुर्घटना घडली. आता होर्डिंग लावणाऱ्यावर गुन्हा दाखल करण्यात आला आहे. मुख्यमंत्र्यांनी मृतांच्या कुटुंबियांना मदत जाहीर केली आहे.
मुंबई : मुंबईसह उपनगरात आज वादळी वाऱ्यासह पाऊस झाला. या वादळी वाऱ्यात घाटकोपर येथील एक भलंमोठं होर्डिंग पेट्रोल पंपावर कोसळल्याची दुर्घटना घडली. होर्डिंग कोसळल्यानंतर त्याखाली अनेक गाड्या आणि लोक दबली गेली. आतापर्यंत या दुर्घटनेत मृतांचा आकडा वाढला असून आठ ते नऊ जणांचा मृत्यू झाल्याची माहिती आहे. तर ५९ जण जखमी झाले आहेत. अद्याप होर्डिंगखाली १०० जण अडकल्याची भीती व्यक्त केली जात आहे. अग्निशमन दल आणि एनडीआरएफकडून युद्धपातळीवर मदतकार्य सुरू आहे. आता होर्डिंग मालकावर गुन्हा दाखल करण्यात आला आहे.
घाटकोपर पूर्व येथील पेट्रोल पंपावरील होर्डिंग कोसळल्याच्या घटनेबाबत सीआर क्रमांक ३५३/२०२४, आयपीसी ३०४,३३८,३३७,३४ या अंतर्गत मालक भावेश भिडे आणि इतरांविरुद्ध पंतनगर पोलीस ठाण्यात गुन्हा दाखल करण्यात आला आहे. याप्रकरणी पंतनगर पोलीस पुढील तपास करत आहेत.
चार होर्डिंग उभारण्यात आले होते. त्यापैकी एक पडले. होर्डिंग ४० बाय ४० या साईजमध्ये असावे. मात्र हे कोसळलेलं होर्डिंग १०० बाय १२० असं भलंमोठं होर्डिंग उभारण्यात आलं होतं. मुंबईत सोमवारी आलेल्या वादळी पावसाने हे होर्डिंग कोसळलं. पाऊस आल्याने अनेकजण त्याखाली उभे होते. त्यांच्यावर हे कोसळलं आणि मोठी दुर्घटना घडली. चारपैकी एक होर्डिंग कोसळलं असून आता पुढील तीन होर्डिंग तात्काळ काढण्याचे आदेश आयुक्तांनी दिले आहेत.
मुख्यमंत्री एकनाथ शिंदे यांनी या दुर्घटनेत मृत्यू झालेल्यांच्या कुटुंबियांना ५ लाखांची मदत जाहीर केली आहे. त्याशिवाय अनधिकृत आणि धोकादायक होर्डिंग हटवणार असल्याचे आदेशही त्यांनी दिले आहेत. क्रेन आणि हायड्रा या मदतीने बचावकार्य सुरू आहे.
.jpeg)
0 Comments